Bie ndjeshëm çmimi i naftës në bursat ndërkombëtare

Keystone (AP Photo/Bela Szandelszky)

Bëhet e ditur se çmimi i naftës së papërpunuar në tregjet botërore bie sërish nën 100 dollarë për fuçi dhe prek kuotat më të ulëta që prej mesit të muajit prill. Në bursën e Teksasit, nafta bruto tregtohet këtë të premte me rreth 96 dollarë për fuçi, ndërsa në atë të Londrës rreth 99 dollarë. Çmimet janë për kontratat e blerjeve, përkatësisht për muajt gusht dhe shtator. Çmimi më i ulët u arrit të enjten kur në bursën e Teksasit një fuçi u tregtua edhe më 91 dollarë, përcjell albinfo.ch.

Thuhet se rënia ka të bëjë me vendimet e marra nga Rezerva Federale amerikane, për të ulur inflacionin që ka arritur nivelet më të larta të 5 dekadave të fundit, por mbi të gjitha me vizitën e presidentit amerikan, Joe Biden, në Arabinë Saudite që nis këtë të premte. Shefi i Shtëpisë së Bardhë pritet t’u kërkojë monarkëve sauditë që janë prodhuesit më të mëdhenj në botë rritjen e prodhimit të naftës.

Riadi nuk u është përgjigjur pozitivisht thirrjeve të këtyre muajve të Uashingtonit për të ndihmuar në zbutjen e krizës globale të energjisë që ka shkaktuar sulmi rus në Ukrainë. Por marrëdhëniet mes dy vendeve janë ftohur që në 2018-ën, pas vrasjes së gazetarit Kashoxhi, për të cilën u fajësua Arabia Saudite.