Të dhënat e INSTAT tregojnë se 302 ndërmarrje të huaja kanë mbyllur aktivitetin e tyre në vitin 2016.
Më së shumti janë mbyllur bizneset me orgjinë greke, italiane dhe ato nga Kosova.
Në vitin 2015 numri i bizneseve të huaja në raport me 2014 u rrit me 16 %. Sipas aktivitetit ekonomik, 30% e ndërmarrjeve të huaja janë të përqendruara në sektorin e tregtisë dhe 30% të tjera në sektorin e shërbimeve dhe 20% janë në sektorin e industrisë.
Sic raporton Monitor, një tjetër arsye që ka ndikuar në mbylljen e kompanive të huaja në 2016-n është dhe pastrimi i regjistrave nga tatimet (subjektet që kishin më shumë se 12 muaj pa kryer aktivitet u kaluan si pasive), ku doli në pah që një pjesë e konsiderueshme e sipërmarrjeve italiane vetëm sa regjistronin aktivitetin në Shqipëri dhe më pas nuk kryenin asnjë veprim, një skemë e dyshuar kjo evazioni ose pastrimi parash nga kompanitë italiane.
Sipas INSTAT, ndërmarrjet e mëdha me pronarë apo bashkëpronarë të huaj ushtrojnë aktivitetin ekonomik kryesisht në: Call Center, Prodhim Veshje e Këpucë dhe Aktivitetet Bankare.
Ndërmarrjet e huaja janë përqendruar kryesisht në qarqet Tiranë dhe Durrës dhe rreth 77% prej tyre kanë vetëm nga 1-4 punëtorë.
