Borrell javën e ardhshme dorëzon raportin për heqjen ose jo të masave ndaj Kosovës

Shefi i diplomacisë evropiane, Josep Borrell, pritet që gjatë javës së ardhshme të dorëzojë raportin lidhur me mundësinë e heqjes së masave ndaj Kosovës, shkruan “RTK”.

Ky raport duhet t’u dorëzohet shteteve anëtare të cilat më pas shqyrtojnë nëse janë arritur kushtet për heqjen e masave, të cilat Bashkimi Evropian i kishte vendosur vitin e kaluar.

Akoma mbetet e paqartë nëse Borrelli do të rekomandojë heqjen e masave.

Siç raporton “RTK” me burime diplomatike, gjithçka do varet nga terminologjia si dhe qasja të cilën shefi i diplomacisë evropiane do e përdorë në raport.

“Nëse ai do i referohet vetëm kërkesave të cilat BE-ja i kishte parashtruar autoriteteve të Prishtinës në qershor të vitit të kaluar e të cilat kishin të bëjnë me hapat drejt de-përshkallëzimit të lidhura me procesin zgjedhor në katër komunat e veriut, atëherë, këto burime konsiderojnë se rekomandimi për heqjen e masave është i mundshëm”, shkruan RTS.

Sidoqoftë, veprimet e fundit lidhur me operacionet policore në institucione financiare  të Serbisë në veri, pritet të përmenden në raport. Këtë e ka konfirmuar më herët edhe zëdhënësi i BE-së, Peter Stano. Mirëpo gjithçka do varet nga ajo se në çfarë konteksti do përmenden këto operacione.

Pas masave ndëshkuese, Kosova ka mbetur jashtë granteve që BE-ja i ka miratuar në korrik të vitit të kaluar, në vlerë prej 2.1 miliardë eurosh.

Më 15 dhjetor të vitit 2022, Kosova ka aplikuar për anëtarësim në BE. Kosova është vendi i vetëm në Ballkanin Perëndimor që nuk ka statusin e vendit kandidat për anëtarësim në bllok./RTK