Bujqësia e Kosovës përfiton 20 milionë nga BB-ja

Ratifikimi i kredisë së Bankës Botërore pritet të bëhet në seancën e ardhshme parlamentare

Ministri i Bujqësisë, Pylltarisë dhe Zhvillimit Rural, Blerand Stavileci ka zhvilluar të martën një takim me drejtoreshën regjionale e Bankës Botërore, Jane Armitage dhe përfaqësuesin e BB-së në Kosovë, Jan Peter Olters, me ç’rast janë diskutuar çështjet rreth finalizimit të kredisë në vlerë prej 20.15 milionë dollarëve, që Banka Botërore ka miratuar për sektorin e bujqësisë.

Ratifikimi i kredisë së Bankës Botërore pritet të bëhet në seancën e ardhshme parlamentare dhe aprovimi i saj hap rrugë edhe për zbatimin e projektit të DANIDA-s, të miratuar nga MPJ e Danimarkës në vlerë prej rreth 10 milionë eurosh, nga të cilat mjete mbi 80 për qind do të ndahen si grante investive.

“Rezultati i zbatimit të këtij projekti presim që të jetë rritja e konkurrencës në sektorin e bujqësisë, por shpresojmë që masat që do t’i ndërmerrni do të rrisin shkallën e punësimit dhe do të përmirësojnë edhe standardin jetësor në zonat tuaja rurale”, ka thënë Jane Armitage, teksa fliste për rëndësinë e këtij projekti.

Ndërsa ministri i Bujqësisë, Blerand Stavileci tha se kjo kredi e BB-së prej 20.15 milionë dollarëve do të shfrytëzohet më së shumti për grante investive dhe padyshim që këtë efekt pritet të prodhojë implementimi i këtij projekti.

“Rreth 85 për qind e vlerës së përgjithshme të kësaj kredie do të shfrytëzohet për skemën e granteve të zhvillimit rural, e cila synon t’i përmirësojë aftësitë konkurruese të fermerëve dhe agropërpunuesve”, ka thënë ministri.