Bullakaj me shokë, tur çiklistik për më shumë drejtësi sociale

Në Kantonin St. Gallen më 19 dhe 20 qershor (sot dhe nesër) mbahet turi çiklistik “Tour de Saint-Gall” i organizuar nga socialdemokratët e kantonit. 12 kandidatët e Partisë Socialdemokrate për deputetë nacionalë nga ky kanton me pjesëmarrjen në këtë tur duan të dërgojnë një mesazh për më shumë drejtësi sociale, më shumë barazi shansesh dhe më tepër drejtësi në mes të gjeneratave.

Siç shkruan gazeta “Wilernachrichten”, kandidatët e listës 9 të SP-së dhe të sindikatave do të bëjnë një xhiro në 9 etapa përgjatë gjithë territorit të kantonit St. Gallen që është i njohur për gjerësinë e tij dhe trajtën rrethore.

Pjesëmarrës është edhe Arbër Bullakaj, kandidati serioz i kësaj partie për të zënë një vend në Parlamentin Nacional të Zvicrës, njëherësh nënkryetar i partisë në nivel kantoni. Ai do ta bëjë rrugën nga Watwil-i në Wil, qytetin ku jeton dhe punon.

Shqiptarët dhe miqtë e tyre në kantonin St. Gallen e më gjerë janë duke zhvilluar një fushatë sensibilizuese mjaft mbresëlënëse në mbështetje të Bullakajt për Parlamentin Nacional të Zvicrës.