Bytyqi: Shpërndarja e testeve në rrjetet sociale s’do të ndikojë në rezultate

Testi i Maturës Shtetërore 2018 po mbahet në rajonin e Gjilanit dhe Ferizajt që janë përzgjedhur me short publik në afatin e parë të këtij testimi.

Por, si çdo vit tjetër, ky proces nuk po i shpëton mundësisë për kopjim. Teste të shumta janë shpërndarë në rrjete sociale, përcjell albinfo.ch.

Por, ministri i Arsimit, Shyqiri Bytyqi, i cili e ka vizituar qendrën e testimit në shkollën “Kuvendi i Arbërit” në Ferizaj, ka thënë se janë marrë të gjitha masat nga institucionet përgjegjëse dhe se testet e shpërndara në rrjetet sociale nuk do të ndikojnë në rezultate. Ne presim rezultatet më të mira sepse konsiderojmë që këtë vit ka qenë një angazhim i përgjithshëm. Kemi pasur një bashkëpunim shumë të mirë me nivelin lokal dhe kjo ka ndikuar që përgatitje në përgjithësi për këtë vit të jenë më të mira dhe presim rezultate më të mira”, ka thënë Bytyqi.

Këtë vit, testi i maturës do të mbahet në katër regjione, në katër ditë të ndryshme, ku pyetjet e testit nuk do të jenë të njëjta, por do të jenë ekuivalente për nga vlera.