Çfarë do të thotë për ju ulja e fundit e normës së interesit në Zvicër?

Banka Kombëtare e Zvicrës (SNB) njoftoi të enjten uljen e dytë të normës së interesit për vitin 2024. Çfarë do të thotë kjo për konsumatorët?

Pas uljes së normës së interesit në mars 2024 – nga 1.75 në 1.50 për qind – banka qendrore e Zvicrës e uli normën me një çerek për qind në 1.25.

A është kjo një shenjë e mirë? Kryesisht po.

Së pari, sinjalizon se inflacioni ka rënë – që është padyshim një zhvillim pozitiv.

SNB, në fakt, uli parashikimin mesatar të inflacionit vjetor për pjesën tjetër të vitit 2024 – në 1.3 për qind, nga 1.4 për qind më parë, transmeton albinfo.ch.

Si do të mund të përfitoni nga kjo lëvizje?

Shumë varet nëse planifikoni t’i shpenzoni paratë tuaja apo t’i kurseni ato.

Nëse po kërkoni të bëni blerje, që zakonisht bëhen me kredi – si shtëpitë ose automjetet, për shembull – atëherë jeni me fat.

Kjo sepse kur një bankë qendrore ul normat e interesit, kreditë bëhen më të lira. Pra, nëse kualifikoheni për një kredi, kjo është një kohë e mirë për të aplikuar për një të tillë.

Për sa i përket hipotekave, ato ka të ngjarë të bëhen më të lira gjithashtu kur normat e interesit bien, shkruan thelocal.

Megjithatë, ky është rasti vetëm për hipotekat e reja ose ato që duhet të rinovohen.

Nëse keni një hipotekë me normë fikse e cila nuk është e gatshme për rinovim, atëherë nuk do të mund të përfitoni nga norma më të ulëta interesi.

Po qiratë?

Me ndryshimin e normës së interesit – dhe duke pasur parasysh një parashikim pozitiv në frontin e inflacionit – ndoshta nuk do të ketë rritje të mëtejshme të normave të interesit referencë që përcaktojnë qiratë në të ardhmen e afërt.

Sa i përket nëse ju kualifikoheni për uljen e qirasë, kjo varet nëse qiraja juaj është e lidhur me normën e interesit – pasi rreth 54 për qind e kontratave janë në Zvicër.

Nëse është kështu, dhe kostot tuaja u rritën kur u rrit norma e interesit, normalisht mund të kërkoni një ulje.

Sidoqoftë, mbani në mend se faktorë të tjerë përveç normës së interesit hyjnë në lojë në përcaktimin e qirave. Faktorë të tillë mund të përfshijnë një rritje të kostos së mirëmbajtjes së ndërtesës ose sigurimit, për shembull.

Kur një normë më e ulët e interesit nuk është një gjë e mirë?

Nëse keni para në bankë dhe vareni nga “rritja” e tyre – nuk jeni me fat.

Ndërsa norma e interesit zvogëlohet, po kështu edhe kthimet në asetet tuaja.

---