Çfarë po bën Salzburgu për të ulur koston e qirasë?

Qeveria në Salzburg po diskuton një projektligj të ri që synon të sigurojë strehim më të përballueshëm në qytet.

Qiratë në qytet janë rritur më shpejt se kudo tjetër në Austri.

“Në pesë vitet e fundit, çmimet janë rritur jashtëzakonisht. Shumë më tepër se nivelet e të ardhurave,” tha Inge Strassl, udhëheqëse e projektit për kërkimin e strehimit në Institutin e Salzburgut për Strehimin dhe Planifikimin Rajonal (SIR), shkruan The Local.

Që nga viti 2005, Salzburgu ka kryesuar listat për kostot e qirasë në krahasim me shtetet e tjera austriake, sipas raporteve të fundit. Një qira tipike në Salzburg është rritur nga 6.50 euro për metër katror në 9.90 euro deri në vitin 2020.

Çfarë po bëjnë autoritetet?

Qeveria po shikon të trajtojë këtë çështje, megjithëse shumë detaje mbeten të paqarta.

Koalicioni i ri, i përbërë nga Partia Popullore Austriake liberale-konservatore (ÖVP) dhe Partia e Lirisë së krahut të djathtë (FPÖ) ka diskutuar draftin e një ligji të ri për subvencionimin e strehimit, njoftoi transmetuesi ORF, përcjell albinfo.ch.

Ligji do të krijojë një “Aleancë për strehim të përballueshëm” për popullsinë nga viti 2025. Kjo aleancë do të përfshijë Dhomën e Tregtisë dhe të Punës, bankat, bashkitë dhe zhvilluesit e pronave.

Për momentin, banesat e subvencionuara më të përballueshme të Salzburgut përbëjnë rreth një të katërtën e stokut të banesave të qytetit.

Një qëllim i madh i legjislacionit të ri do të jetë ndërtimi i shtëpive më të përballueshme, shkruan The Local.

Land-Invest, një degë në pronësi të plotë të provincës së Salzburgut, do të zgjerohet dhe forcohet financiarisht për të siguruar tokë ndërtimi të përballueshme.

“Land-Invest duhet të veprojë si një bankë toke që blen tokë për shtetin,” tha kreu i qeverisë së Salzburgut, Wilfried Haslauer (ÖVP).

Martin Zauner (FPÖ), këshilltari rajonal për strehim, theksoi gjithashtu se nevojiteshin më shumë tokë të disponueshme për të ndërtuar banesa.

“Ne kemi nevojë për tokë. Për këtë na duhen komunat. Ne duam t’i mbështesim në zhvillimin dhe mobilizimin e tokës ndërtimore.”

Objektivat e strehimit apo modelet e financimit për subvencionimin e banesave nuk u prezantuan pas takimit të së hënës.

Megjithatë, koalicioni ka vendosur një afat për ligjin e ri. Ata thonë se do të hyjë në fuqi më 1 janar 2025, përcjell albinfo.ch.

 

---