Të dhënat e ASK-së për vitin akademik 2025/2026 tregojnë se biznesi, administrata dhe ligji kryesojnë regjistrimet e reja në studimet Bachelor dhe Master, ndërsa dallimet gjinore vërehen në përzgjedhjen e disa fushave të studimit.
Biznesi, administrata dhe ligji janë fushat më të preferuara nga studentët që janë regjistruar për herë të parë në studimet Bachelor dhe Master në Kosovë gjatë vitit akademik 2025/2026, përcjell albinfo.ch.
Sipas të dhënave të Agjencisë së Statistikave të Kosovës (ASK), në këto fusha janë regjistruar 5.416 studentë të rinj në nivelin Bachelor dhe 1.528 në nivelin Master.
Statistikat tregojnë edhe dallime në përzgjedhjen e drejtimeve universitare sipas gjinisë. Femrat kanë pjesëmarrje më të lartë në fushat e arsimit, shëndetësisë dhe shkencave shoqërore, ndërsa meshkujt dominojnë në teknologjinë informative dhe komunikim.
Në anën tjetër, bujqësia, pylltaria, peshkimi dhe veterinaria janë fushat me numrin më të ulët të studentëve të regjistruar për herë të parë në të dy nivelet e studimit.
Të dhënat e ASK-së paraqesin preferencat e studentëve për drejtimet universitare në Kosovë dhe dallimet në interesimin për fusha të ndryshme të studimit gjatë vitit akademik 2025/2026./Albinfo.ch
