Çokollatat janë ndër shijet më të preferuara për shumicën e njerëzve që në moshën fëmijërore. Ky produkt ushqimor industrial ka për bazë kakaon, ndërsa konsumohet në forma të ndryshme, qoftë si desert në vete ose si shtojcë në pjata të tjera.

Sipas literaturës, njerëzimi ka konsumuar kakaon në ndonjë lloj forme edhe 2 mijë vjet para erës sonë.

Por, cilat shtete janë sot tregtarët më të mëdhenj të kakaos, dhe cilat e konsumojnë atë më së shumti?

Gjermania eksporton më së shumti, Turqia e 8-ta në botë

Sipas faqes Statista, Gjermania eksporton bindshëm më së shumti çokollatë në botë. Në vitin 2022, Gjermania ka eksportuar mbi 1 milion tonë çokollatë.

Pas saj vijnë Belgjika (594 mijë tonë) dhe Holanda (482 mijë tonë).

Turqia, me 252 mijë tonë çokollatë të eksportuara në vitin 2022, radhitet e teta në botë për eksportin e çokollatës.

Eksportuesit (milionë kilogramë)

Gjermania 1009

Belgjika 594

Holanda 482

Polonia 456

Italia 415

ShBA-ja 333

Franca 323

Turqia 252

SHBA-ja, importuesja numër një e çokollatës

SHBA-ja është vendi që importon më së shumti çokollatë në botë. Sipas Statistas, në vitin 2022 SHBA-ja ka importuar 746 mijë tonë çokollatë, ndërsa ka eksportuar 333 mijë tonë.

Ndër importuesit më të mëdhenj janë edhe Franca (547 mijë tonë) dhe Gjermania (526 mijë tonë).

Importuesit (milionë kilogramë)

SHBA-ja 746

Franca 547

Gjermania 526

Holanda 347

Belgjika 260

Zviceranët, të dashuruarit pas çokollatës

Sa i përket konsumit të çokollatës, zviceranët janë bindshëm në vend të parë. Gjatë vitit 2022, një zviceran ka konsumuar mesatarisht 11,8 kilogramë çokollatë, duke shpenzuar rreth 280 dollarë vetëm për këtë produkt.

Pas Zvicrës vijnë amerikanët, të cilët konsumojnë mesatarisht 9 kilogramë çokollatë për kokë banorë. Mesatarisht një amerikan shpenzon rreth 155 dollarë në vit për çokollata.

Gjermanët, francezët dhe britanikët plotësojnë top 5-shen botërore për konsumin e çokollatës.

Konsumuesit (kilogramë për kokë banori)

Zvicra 11,8

SHBA-ja 9

Gjermania 5,8

Franca 3,6

Britania 2,9.