Cyrihu kontribuon me një të pestën e GDP-së së Zvicrës

Studim: Kantoni i Cyrihut mbetet motori kryesor ekonomik i vendit, me dominim të sektorit të shërbimeve

Kantoni i Cyrihut vazhdon të jetë një nga shtyllat kryesore të ekonomisë zvicerane, duke kontribuar me rreth 21 për qind të prodhimit të brendshëm bruto (GDP) të Zvicrës. Këto të dhëna janë publikuar në një studim të Bankës Kantonalë të Cyrihut, përcjell albinfo.ch.

Sipas studimit, Cyrihu shquhet veçanërisht për fuqinë e tij në sektorin e shërbimeve, i cili përbën rreth një të katërtën e të gjitha shërbimeve në nivel kombëtar. Ky sektor përfaqëson gjithashtu bazën kryesore të ekonomisë së kantonit, duke gjeneruar afërsisht 70 për qind të GDP-së së tij.

Këto shifra e pozicionojnë Cyrihun si një qendër ekonomike të rëndësishme jo vetëm për Zvicrën, por edhe për rajonin më të gjerë, duke luajtur rol kyç në krijimin e vlerës së përgjithshme ekonomike të vendit./Albinfo.ch

---