Shoqata Kulturore Artistike Shqiptare “Dardania” në Winterthur të Zvicrës do të shënojë Ditën e Flamurit Kombëtar Shqiptar dhe 32-vjetorin e themelimit përmes një mbrëmjeje festive, e cila do të mbahet më 28 nëntor 2026, transmeton albinfo.ch.
Aktiviteti do të mbledhë bashkatdhetarë, miq dhe dashamirë të kulturës shqiptare, në një program që synon të promovojë traditat, vlerat kombëtare dhe veprimtarinë kulturore e artistike të komunitetit shqiptar në diasporë.
Sipas organizatorëve, programi do të përfshijë këngë, valle tradicionale shqiptare, dramatizime që trajtojnë aktualitetin, si dhe surpriza të tjera për pjesëmarrësit.
Mbrëmja festive do të mbahet në sallën e Kantonsschule Rychenberg, në adresën Rychenbergstrasse 110, 8400 Winterthur. Dyert do të hapen në orën 19:00, ndërsa fillimi i programit është paraparë për orën 20:00.
Përmes kësaj feste, “Dardania” synon të shënojë një moment të rëndësishëm të veprimtarisë së saj, duke bashkuar festën kombëtare me përvjetorin e një shoqate që prej 32 vjetësh vepron në fushën e kulturës dhe artit shqiptar në Zvicër.
Organizatorët u kanë bërë thirrje bashkatdhetarëve që t’i bashkohen festës për të kremtuar së bashku 28 Nëntorin, nën simbolin e flamurit kuqezi, dhe për të ndarë një mbrëmje të veçantë në shenjë krenarie për gjuhën, historinë dhe kulturën shqiptare./Albinfo.ch
