Dea Fetiu diplomohet me Distinction në Universitetin e Cambridge

Nga Kosova drejt Universitetit të Cambridge, Dea Fetiu përfundoi studimet në Multi-disciplinary Gender Studies dhe hulumtoi përvojat e të mbijetuarve të dhunës seksuale gjatë luftës në Kosovë

Dea Fetiu ka përmbyllur me sukses studimet Master në University of Cambridge, një prej universiteteve më prestigjioze në botë, duke u diplomuar me vlerësimin Distinction në programin Master of Philosophy (MPhil) in Multi-disciplinary Gender Studies, transmeton albinfo.ch.

Gjatë studimeve në Cambridge, Fetiu e ka përqendruar hulumtimin e saj në një temë të ndjeshme dhe me rëndësi të veçantë për Kosovën: mënyrën se si të mbijetuarit e dhunës e kuptojnë dhe e përjetojnë dhunën në jetën e tyre të përditshme pas përvojave të dhunës seksuale gjatë luftës në Kosovë.

Përmes këtij hulumtimi, ajo është fokusuar në përvojat dhe perspektivat e të mbijetuarve, duke e trajtuar këtë çështje në kuadër të studimeve multidisiplinare mbi gjininë.

Rrugëtimi i saj drejt Cambridge-it u bë i mundur përmes Chevening Scholarship, programit prestigjioz të bursave të Qeverisë së Mbretërisë së Bashkuar. Si Chevening Alumna, Fetiu e ka përshkruar këtë përvojë si një periudhë që i hapi dyer jo vetëm në aspektin akademik, por edhe për mundësi të veçanta jashtë auditorëve universitarë, transmeton tutje  albinfo.ch

Një prej momenteve të veçanta të këtij rrugëtimi ishte edhe takimi me Mbretin Charles III, përvojë të cilën ajo e ka cilësuar si të paharrueshme në kuadër të përvojës së saj si bursiste e Chevening.

Viti akademik në Cambridge, siç ka rrëfyer Fetiu, ishte intensiv dhe sfidues, por njëkohësisht ndër vitet më argëtuese dhe më shpërblyese të jetës së saj. Përveç zhvillimit akademik, ajo veçon edhe rritjen personale, njerëzit që ka njohur dhe miqësitë që ka krijuar gjatë kësaj periudhe.

Momentin e diplomimit ajo e ka ndarë me familjen e saj, të cilën e konsideron pjesë të rëndësishme të këtij rrugëtimi.

Fetiu ka shprehur mirënjohje edhe për mentorët dhe miqtë në Kosovë, të cilët e kanë inkurajuar të aplikojë në Cambridge në një kohë kur, sipas saj, ky universitet i dukej si një ëndërr. Mirënjohje të veçantë ajo ka edhe për mentorët që ka takuar në Cambridge dhe që e kanë bërë këtë përvojë edhe më domethënëse.

Përfundimi i Masterit me Distinction në Cambridge shënon një tjetër arritje në rrugëtimin akademik të Dea Fetiut, ndërsa tema e hulumtimit të saj e lidh këtë përvojë ndërkombëtare me një prej çështjeve më të ndjeshme të historisë së Kosovës.

Përmes përvojës së saj në Cambridge dhe Chevening, Fetiu është bërë pjesë e një rrjeti ndërkombëtar të profesionistëve dhe liderëve të rinj, duke e shndërruar një mundësi që dikur i dukej si ëndërr në një përvojë konkrete akademike dhe profesionale./Albinfo.ch

---