Katër adoleshentë humbin jetën në aksident të rëndë në Gjermani

Një shofer 61-vjeçar përplasi tre motorista gjatë një parakalimi në drejtim të kundërt, duke shkaktuar vdekjen e katër të rinjve, mes tyre edhe një 14-vjeçare.

Katër të rinj kanë humbur jetën në një aksident të rëndë trafiku të mërkurën mbrëma në landin Brandenburg të Gjermanisë, transmeton albinfo.ch.

Aksidenti ndodhi pranë Biesenthalit, në verilindje të Berlinit. Sipas policisë, një shofer 61-vjeçar po tentonte të parakalonte disa automjete në një rrugë nacionale dhe hyri në korsinë e kundërt, ku u përplas me tre mopedë.

Në tre mjetet udhëtonin gjithsej katër persona, të moshave 14 deri në 19 vjeç. Tre drejtuesit dhe një pasagjere humbën jetën në vendin e ngjarjes. Një tjetër drejtues i mopedëve arriti të shmangte përplasjen dhe mbeti i padëmtuar.

Pas aksidentit, automjeti i shoferit mori flakë. Ekipet e emergjencës arritën ta nxjerrin atë nga makina e përfshirë nga zjarri. 61-vjeçari, i cili kishte pësuar lëndime të rënda, u transportua me helikopter në spital.

Rruga u mbyll për disa orë, ndërsa në vendngjarje u ofrua edhe mbështetje psikologjike për familjarët e viktimave dhe pjesëtarët e ekipeve të shpëtimit. /Albinfo.ch

---