Debati zgjedhor në Ukrainë do të mbahet në stadium

Kandidati presidencial dhe komediani ukrainas, Volodimir Zelenskiy, publikoi një video në stilin e serialit të tij të njohur televiziv, duke e sfiduar Petro Poroshenkon për të marrë pjesë në debatet zgjedhore. Në video, ai kalon nëpër Kompleksin Kombëtar të Sporteve, ‘Olimpiyskiy’.

Zelenskiy, i cili fitoi rundin e parë të zgjedhjeve presidenciale, i kërkoi Poroshenkos të mbajë debat në stadiumin e kapacitetit prej 65,000 spektatorësh.

E, Poroshenkos ia dha 24 orë për t’u përgjigjur. Pasi u publikua në Facebook, videoja grumbulloi rreth 40,000 pëlqime dhe 52,000 shpërndarje. Përgjigja nga Poroshenko erdhi shpejt.

“Duke qenë president dhe komandant i ushtrisë, do të thotë se bartni përgjegjësinë për njerëzit dhe vendin. Kjo përgjegjësi është brenda Ukrainës dhe në arenën ndërkombëtare. Debatet nuk mbahen për hir të një spektakli në stadium. Por, në qoftë se ju dëshironi që debati të mbahet në stadium, atëherë le të jetë ashtu”, tha Poroshenko. Përndryshe, rundi përfundimtar i zgjedhjeve presidenciale do të zhvillohet më 21 prill.