Dëbohet familja shqiptare e kërcënuar nga hakmarrja

Familja e cila prej muajsh ka përdorur çdo mjet qoftë edhe mediatik për të fituar të drejtën e qëndrimit në Austri, është dashur ta lëshojë vendin. Familja, në kërkesën e saj për azil, ka pohuar se në Kosovë ndihet e rrezikuar nga hakmarrja dhe për këtë arsye ka kërkuar azil në Austri

Zyrtarët e policisë austriake të martën në mëngjes kanë dëbuar një familje shtatanëtarëshe nga Lauterach-i i Austrisë për në Kosovë.

Familja e cila prej muajsh ka përdorur çdo mjet qoftë edhe mediatik për të fituar të drejtën e qëndrimit në Austri, është dashur ta lëshojë vendin. Familja, në kërkesën e saj për azil, ka pohuar se në Kosovë ndihet e rrezikuar nga hakmarrja dhe për këtë arsye ka kërkuar azil në Austri.

Për t’ia bërë të mundur qëndrimin në Austri kësaj familjeje, në ndihmë muaj më parë kishin dalë edhe mësuesit dhe nxënësit e shkollës së Lauterach-ut të cilët me balona kishin bërë një protestë ku kërkonin qëndrimin e kësaj familje. Kjo përkrahje ndaj familjes kosovare kishte bërë jehonë të madhe në mediet austriake, njofton “albinfo.ch”.

Por kështu nuk kanë menduar edhe autoritetet e këtij shteti. Ata në orën 6 të mëngjesit kanë marrë familjen dhe kanë dërguar për në Vjenë e që më pastaj të bëhet udhëtimi për në Kosovë. “Dëbimi është bërë pa asnjë problem”, thotë policia austriake për vol.at

Ndërkohë një avokat austriak shpreson se familja të kthehet sërish në Austri. Ai është i autorizuar nga familja për të bërë një kërkesë për mbrojtje të veçantë. Në Austri sipas tij është edhe një mënyrë tjetër për të marrë të drejtën e qëndrimit. Mirëpo, kjo nuk mund të bëhet nga jashtë shtetit. “Prandaj do të mundohem që familjen ta sjell në Austri dhe nga këtu të bëjmë kërkesën e re”, ka thënë ai.

Mësuesit ku fëmijët kanë vijuar mësimin si dhe shokët e tyre të klasës janë ndier shumë të pikëlluar për largimin e tyre. Ata kanë thënë se familja ishte mirë e integruar, kishte mësuar shumë mirë gjuhën gjermane dhe fëmijët kishin nota të mira në mësim.