Dëmtohen rrugët si pasojë e punimeve jocilësore

Si rezultat i punimeve jocilësore dhe mirëmbajtjes jo të mirë, gjendja e infrastrukturës rrugore në Kosovë është tejet e rënduar.

Organizata joqeveritare “AVONET” nëpërmjet një komunikate për media vlerëson se ekzekutimi i punimeve në infrastrukturë rrugore është shumë i dobët dhe jocilësor dhe si rezultat ka dëmtime të shpejta të rrugëve, të cilat për t’u sanuar e rëndojnë buxhetin e Kosovës, por në disa raste gjendja jo e mirë e rrugëve paraqet edhe rrezik për komunikacion.

Kjo organizatë i bënë thirrje të gjitha institucioneve të shtojnë kujdes të veçantë në mbikëqyrje për ngritjen e cilësisë së punimeve të infrastrukturës rrugore si dhe mirëmbajtjes së rrugëve.

“Qeveria e Kosovës, tash e disa vite me radhë, investimet kapitale në pjesën më të madhe i ka orientuar në ndërtimin e rrugëve duke menduar se do të derivojë në zhvillim ekonomik, mirëpo mbetet për një analizë dhe vlerësim më të hollësishëm se niveli i tanishëm i zhvillimit ekonomik se a është në harmoni dhe a i përgjigjet asaj që investimet kryesore kapitale është dashur dhe duhet të orientohen në ndërtimin e rrugëve”, thuhet në komunikatën e lëshuar nga AVONET.

AVONET kërkon nga Ministria e Infrastrukturës që të themelojë një komision dhe të bëjë vlerësimin e gjendjes së rrugëve dhe në këtë komision të ketë përfaqësues nga shoqëria civile.