Depozitë deri në 15 mijë dollarë për aplikim për vizë amerikane: SHBA zgjeron listën e vendeve

Pagesa e një depozite prej 15,000 dollarësh nuk siguron miratimin e vizës amerikane, megjithatë shuma u kthehet aplikantëve në rast refuzimi. Shtetet e Bashkuara kanë shtuar edhe shtatë shtete të reja në listën e vendeve, qytetarët e të cilave janë të detyruar të paguajnë këtë depozitë për të aplikuar për vizë, sipas raportimit të moneycontrol.

Me këtë vendim, numri total i vendeve në listë shkon në 13, prej të cilave 11 janë shtete afrikane. Kjo masë e bën procesin e aplikimit për vizë amerikane jashtëzakonisht të shtrenjtë dhe të vështirë për një numër të madh qytetarësh.

Departamenti Amerikan i Shtetit njoftoi se në listë janë përfshirë Butani, Botsvana, Republika e Afrikës Qendrore, Guinea, Guinea-Bisau, Namibia dhe Turkmenistani. Vendimi ka hyrë në fuqi më 1 janar.

Më herët, në muajin tetor, në këtë listë u shtuan Mauritania, Sao Tome dhe Principe, Tanzania, Gambia, Malavi dhe Zambia.

Përmes kësaj depozite, SHBA synon të forcojë kontrollin e hyrjes në vend. Përveç pagesës financiare, të gjithë aplikantët për vizë janë të detyruar të zhvillojnë intervista personale, të paraqesin të dhëna mbi aktivitetin e tyre në rrjetet sociale, si dhe informacione të detajuara për udhëtimet dhe vendbanimet e mëparshme, si për veten ashtu edhe për anëtarët e familjes.