Deputetja gjermane: Stop negociatave për anëtarësimin e Serbisë në BE

Gjermani - unsplash - photo by Florian Wehde

Në fjalimin e saj, deputetja gjermane, Renata Alt, thotë se Bashkimi Evropian pas deklaratës së Aleksandar Vuçiqit gjatë seancës së betimit si president i Serbisë në lidhje me Kosovën, menjëherë duhet të ngrijë bisedimet për anëtarësimin e Serbisë në BE, transmeton albinfo.ch.

Kryetarja e Komisionit për të Drejtat e Njeriut dhe Ndihmën Humanitare në Bundestagun gjerman, deputetja e Partisë Liberale Gjermane (FDP), Renata Alt, deklaroi për DW-në se “Vuçiqi tregon se nuk i kushton ndonjë rëndësi normalizimit afatgjatë të marrëdhënieve me fqinjin e tij. Tonet e mprehta nga Beogradi e rëndojnë situatën gjithësesi të tensionuar mes dy vendeve. Fakti që Vuçiqi po rrit njëkohësisht bashkëpunimin me Kremlinin dhe nuk po pranon t’u bashkohet sanksioneve kundër Rusisë, është diametralisht i kundërt me politikën e jashtme të BE-së. Prandaj negociatat e pranimit të Serbisë në BE duhet të ngrihen menjëherë”.

Para disa ditësh Vuçiqi në një  bisedë telefonike me presidetin rus, Vladimir Putin, ka rënë dakord që Serbia të vazhdojë të marrë edhe për tre vjet gaz nga Rusia. Putin dhe Vuçiq kanë ranë dakord gjatë telefonatës që të forcojnë partneritetin. Burimet ruse thonë se gjatë telefonatës Putini dhe Vuçiqi kanë biseduar edhe për gjendjen në Ukrainë dhe për Kosovën.