Deschamps përmend 3 lojtarë të rrezikshëm te Zvicra, mes tyre edhe Shaqiri

Didier Deschamps ka thënë se nuk do të nënçmojnë Zvicrën, edhe pse hyjnë si favorit

Trajneri i Francës, Didier Deschamps, edhe pse e ka pranuar se janë favorit përballë Zvicrës, thotë se nuk bën të nënçmojnë kundërshtarin dhe do të hyjnë me seriozitetin më të madh.

“I njohim mirë helvetet, kanë një potencial sulmues shumë interesant me Seferoviq, Embolo dhe Shaqirin. Për më tepër, dinë si t’u përshtaten kundërshtarëve. Kanë një lojë sulmuese shumë të veçantë, nuk duhet t’i nënvlerësojmë. Duhet të japim maksimumin për të dalë nga kjo ndeshje me buzëqeshje”, theksoi trajneri francez.

Ai foli edhe për analistët që e kanë vlerësuar Francën si top favorit. “Të gjithë thonë se favoritët jemi ne, është normale të kemi këtë status, e pranojmë dhe nuk na shqetëson. Por diçka tjetër është në letër dhe diçka tjetër fushë, e di që kundërshtarët janë në lartësinë e duhur dhe e thashë edhe para se të përballeshim me Hungarinë, që asnjë nuk e merrte në konsideratë, por që sapo e kishte bërë të vuante Portugalinë”, u shpreh Didier Deschamps.

---