Austri: Deshi të ndërmjetësonte, plagoset në kokë kosovari i pafajshëm

Në spital, mjekët gjetën dy shpime rreth një centimetër të thellë në kokën e tij dhe thirrën policinë

Në orët e hershme të mëngjesit të së shtunës, një 32-vjeçar në Schärding ka deklaruar se rrugës për në shtëpi ka rënë në një zënkë dhe ka marrë plagë në kokë, transmeton albinfo.at. Ai kishte dashur të pajtonte dy burra që po grindeshin dhe u lëndua gjatë këtij tentimi.

32-vjeçari kosovar nga lagjja Schärding kishte dalë nga një restorant pak pas orës 3 të mëngjesit dhe ishte nisur për në shtëpi. Në Parkun Grafenau ai pa se dy persona që nuk i njihte po grindeshin, shkruan orf.at. Ai më vonë ka deklaruar para policisë se donte vetëm të ndërmjetësonte dhe duke bërë këtë, u plagos në kokë. Kur vuri re pak më vonë se i rridhte gjak nga koka, ai shkoi në spitalin Schärding për të marrë trajtim mjekësor.

Në spital, mjekët gjetën dy shpime rreth një centimetër të thellë në kokën e tij dhe thirrën policinë, përcjell albinfo.at. Me të mbërritur policët, 32-vjeçari është treguar kooperues, por nuk ka mundur të japë asnjë informacion për autorët e mundshëm.

I plagosuri më pas është dashur të transferohet në spitalin në Ried për trajtim të mëtejshëm.

 

---