“Disfatë poshtëruese para vetes e botës”

“Çfarë disfate poshtëruese para vetes e botës, para shtetit të vet. Vizita në gjithë Kosovën nuk është dashur të lejohet në rend të parë asnjëherë”, ka shkruar Abdixhiku

Deputeti i Lidhjes Demokratike të Kosovës, Lumir Abdixhiku ka komentuar ndalimin që i është bërë nga Qeveria e Kosovës presidentit serb, Aleksander Vuçiq për ta vizituar zonën e Drenicës.

“Ndalojnë vizitë, e lejojnë atë. E ndalojnë sërish, por tashmë veçse pjesërisht. Presidenti i një vendi armik pasi ka caktuar kufij të rinj, pasi ka folur për resurset e Kosovës sikur ishin të tij, është ndaluar – në i thënshin ashtu, e është kthyer jo në Serbi, por në Veri’, ka shkruar Abdixhiku në profilin e tij në Facebook, përcjell albinfo.ch.

Ai ka kritikuar po ashtu edhe institucionet e Kosovës për të cilat tha se janë të pafuqishme.

“Ndalesa tregon se ku përfundon fuqia e Kosovës, ku nisë ajo e shtetit të tij. Me ose pa dije – më shumë me të dyja bashkë – liderët kosovarë caktuan kufirin e ri politik. Ja, thanë, s’mund të vijë kurrë në Drenicë, le të kthehet në Mitrovicë. Dhe na jepen si triumfalistë.

Çfarë disfate poshtëruese para vetes e botës, para shtetit të vet. Vizita në gjithë Kosovën nuk është dashur të lejohet në rend të parë asnjëherë”, ka shkruar Abdixhiku në lidhje me vizitën e Vuçiqit në Kosovë.

---