Dogana e APIK memorandum për tërheqjen e investimeve

Në kuadër të krijimit të lehtësirave për biznesin në Kosovës, Dogana e Kosovës ka thjeshtësuar procedura administrative doganore

Drejtori i përgjithshëm i Doganës së Kosovës, Naim Huruglica dhe kryeshefi ekzekutiv i APIK-ut, Valdrin Lluka, kanë nënshkruar memorandumin e bashkëpunimit, i cili ka për qëllim që të dyja palët të ndihmojnë në tërheqjen dhe në rritjen e investimeve të huaja në Kosovë.

Sipas këtij memorandumi, Dogana e Kosovës pajtohet që të ndihmojë Ministrinë e Tregtisë dhe Industrisë, respektivisht Agjencinë për Promovimin e Investimeve në Kosovës (APIK), me ndarjen e të dhënave të ndryshme që mund të ndihmojnë për një promovim më të mirë të investimeve në Kosovë.

Gjithashtu sipas këtij memorandumi, një ekspert i doganës do të angazhohet në APIK me qëllim të ofrimit të asistencës në zgjidhjen e problemeve të investitorëve që operojnë në Kosovë.

“Qëllimi i një eksperti të tillë të caktuar nga Dogana e Kosovës është që të ketë informata të sakta rreth importit të pajisjeve, eksportit të produkteve, depove doganore, etj”, thuhet në një komunikatë të lëshuar nga Dogana.

Sipas komunikatës, në kuadër të krijimit të lehtësirave për biznesin në Kosovës, Dogana e Kosovës ka thjeshtësuar procedura administrative doganore, të cilat do të ndikojnë në efikasitetin e punës së Doganës po ashtu edhe për subjektet e afarizmit të tregtisë së jashtme.

“Thjeshtësimi i procedurave nënkupton zvogëlimin e numrit të dokumenteve të cilat kompanitë duhet të prezantojnë në rast të importit. Dokumentet që tani e tutje duhet bashkangjitur deklaratës doganore dhe që janë të obligueshme tanimë janë fatura dhe deklarata eksportuese. Pra, në total janë eliminuar 4 dokumente. Ky veprim do të zvogëlojë kohën e pritjeve dhe do të shpejtoj procedurat në import–eksport”, përfundon komunikata.