Dy të rinjtë shqiptarë nuk e kanë hedhur shokun e tyre nga vetura

Prokuroria ka hequr dorë nga akuza për tentim vrasjeje të qëllimshme. Tash ndaj tyre mbetet akuza për “mos ofrim të ndihmës”

Një aksident që pati ndodhur në fillim të marsit të këtij viti, në tunelin Gubrist, kantoni i Cyrihut, pati bërë jehonë të madhe në mediat e këtushme. Një i ri 23 vjeçar kishte rënë nga vetura në të cilën gjendeshin edhe dy shokë të tij, shqiptarë, njëri nga Kosova dhe tjetri nga Maqedonia, shkruan albinfo.ch. Me atë rast viktima kishte pësuar lëndime të rënda ndërsa dy personat që ishin në makinë ishin arrestuar nën dyshimin se ata e kishin shtyrë shokun e tyre me dhunë, duke ia rrezikuar kështu jetën, shkruan sda.ch.

Por, ndërkohë prokuroria kompetente ka hequr dorë nga akuza për tentim vrasjeje të qëllimshme. Tash ndaj tyre mbetet akuza për “mos ofrim të ndihmës” si dhe për delikte të ndryshme në  trafikun rrugor.

Aktualisht, dy personat ngarkohen me fajin përse nuk i kanë ofruar ndihmë zviceranit 22 vjeçar i cili  kishte mbetur i shtrirë në tunel me lëndime në kokë dhe gërvishtje nëpër trup.

Prokurorja e ngarkuar me lëndën nuk ka dashur të fliste për rrethanat që kanë sjellë te rënia e të riut nga makina, transmeton albinfo.ch. Ajo vetëm ka thënë se dyshimi se dy të rinjtë e kishin hedhur me dhunë nga makina moshatarin e tyre, nuk është dëshmuar si i bazuar.

Të dyshuarit, nga Kantonet Solothurn dhe Bernë,  ishin arrestuar ditën që kishte ndodhur aksidenti. Dy javë më vonë ata janë liruar nga burgu për hetime.

I aksidentuari ndërkohë është mirë me shëndet, njofton prokurorja.