E ardhmja e Etrit Berishës, mes Anglisë dhe Italisë

Etrit Berisha nuk është më portier titullar te skuadra italiane Atalanta. 

Reprezentuesi shqiptar e nisi mirë sezonin me Atalantën, duke mbrojtur rregullisht dhe duke qenë pjesë e rëndësishme e formacionit bazë. 

Por ndeshja e Kupës së Italisë ndaj Fiorentinës (3-3) doli të jetë e fundit për prishtinasin. 

Në atë takim Berisha nuk ishte në formë të mirë dhe që nga ajo kohë portën e Atalantas e mbron Gollini. 

30-vjeçari nuk do të qëndrojë te Atalanta, pasi synon të transferohet te një skuadër, ku do të jetë portier i parë. 

Mediat italiane kanë raportuar se e ardhmja e tij mund të jetë edhe në Angli, ku disa skuadra kanë shfaqur interesim për të. 

Por prishtinasi karrierën mund ta vazhdojë edhe në Itali, ku shumë skuadra e pëlqejnë reprezentuesin shqiptar.