E kafshon dhe e grushton gjyqtarin në sallën e gjykimit

Ai, së pari e ka goditur me grushte dhe pastaj edhe me shqelma sekretarin. Pas kësaj Kuno W., e ka grushtuar dhe pastaj kafshuar po ashtu edhe kryetarin e trupit gjykues, Urs Müller

Ilustrim

Në procesin gjyqësor në Gjykatën e Lartë të Solothurnit, kundër Andres Z., i akuzuar për zjarrvënie në një kishë të këtij qyteti, sot ka ndodhur një incident i rëndë. Një person i njohur si problematik në këtë qytet (Kuno W.) njëherësh mik i të akuzuarit, ka sulmuar fizikisht kryetarin e trupit gjykues dhe sekretarin, shkruajnë Solothurnerzeitung.ch dhe azonline.ch.

Ai, siç shkruajnë mediat në fjalë, së pari e ka goditur me grushte dhe pastaj edhe me shqelma sekretarin, transmeton albinfo.ch Pas kësaj Kuno W., e ka grushtuar dhe pastaj kafshuar po ashtu edhe kryetarin e trupit gjykues, Urs Müller.

Të dy të lënduarit është dashur të dërgohen për trajtim në spital.

Procesi i cili është dashur të fillonte në orën 10.30 është ndërprerë për shkak të mungesës së gjyqtarit.

Ndryshe, problematiku Kuno W., është shumë i njohur në Solothurn për sulmet që u bën herë pas here autoriteteve shtetërore. Sipas mediave, ai ka sulmuar më parë fizikisht edhe një prokuror ndërsa sulmet i arsyeton duke i quajtur bartësit e funksioneve shtetërore “struktura kriminale”, përcjell albinfo.ch. Shtëpia e këtij personi që njihet edhe si shenjëtar i dalluar, është bastisur disa herë nga policia.