EDA këshillon zviceranët të mos udhëtojnë në Rusi

Veç tjerash, edhe tërheqja e parave në Rusi është e pamundur tani për tani. Kartat e kreditit jo-ruse mund të përdoren vetëm në një masë të kufizuar

Departamenti Federal i Punëve të Jashtme (EDA) këshillon qytetarët e Zvicrës të mos udhëtojnë në Rusi. Për shkak të sulmit rus në Ukrainë, situata në Rusi po bëhet gjithnjë e më e paparashikueshme. Përkeqësimi i përnjëhershëm nuk mund të përjashtohet, sipas një postimi në Twitter nga departamenti i jashtëm, shkruan srf.ch.

Për shkak të mbylljes së hapësirës ajrore evropiane për avionët rusë, shumica e fluturimeve direkte nga kompanitë ajrore ruse dhe evropiane  dhe nga Evropa Perëndimore janë ndërprerë, transmeton albinfo.ch. Tani, fluturimet direkte midis Rusisë dhe Zvicrës nuk janë më të mundshme, kujton EDA.

Po ashtu edhe tërheqja e parave në Rusi është e pamundur tani për tani. Kartat e kreditit jo-ruse mund të përdoren vetëm në një masë të kufizuar.

Sipas EDA-s, gjatë demonstratave mund të shpërthejnë përleshje të dhunshme, veçanërisht në Moskë dhe Shën Petersburg. Forcat e sigurisë mund të godasin demonstruesit. Ka po ashtu edhe arrestime të shumta.

---