Edhe Britania ndalon TikTok-un në pajisje qeveritare

Pixabay

Mbretëria e Bashkuar po ndalon përdorimin e aplikacionit TikTok në telefona dhe pajisje të tjera të lëshuara për ministrat e qeverisë dhe nëpunësit civilë.

Ministri i Zyrës së Kabinetit, Oliver Dowden, u tha deputetëve se aplikacioni do të ndalohej për arsye sigurie me efekt të menjëhershëm.

Ai e përshkroi atë si një lëvizje “paraprake”, por “të matur”, pas një rishikimi nga Qendra Kombëtare e Sigurisë Kibernetike.

TikTok megjithatë ka mohuar me forcë akuzat se i dorëzon të dhënat e përdoruesve te qeveria kineze.

“Siguria e informacionit të ndjeshëm të qeverisë duhet të jetë e para”, deklaroi Dowden.

Por, ai u tha deputetëve se ndalimi nuk do të shtrihej në telefonat personalë të ministrave apo nëpunësve civilë, apo publikut të gjerë – sepse kjo ishte një përgjigje “proporcionale” ndaj një “rreziku specifik me pajisjet qeveritare”./bbc