Është djalë fëmija i parë i vitit 2012

Është djalë fëmija i parë i vitit 2012, i cili erdhi në jetë në Shqipëri, vetëm një minutë pas ndërrimit të viteve

Foshnja u lind në orën 00.01 të mëngjesit të së dielës, në spitalin Obstetrik Gjinekologjik të qytetit të Durrësit. Djali gëzon shëndet të plotë, bashkë me nënën e tij.

Edhe në Tiranë, bebja e parë e 2012-ës është djalë. Foshnja lindi në maternitetin Koco Gliozheni, ndërsa gëzon shëndet të plotë bashkë me nënën. Ai quhet Roan dhe peshon 3 kilogramë e 200 gramë. Është biri i prindërve Arjon dhe Adriana.

Kryeministri i Shqipërisë, Sali Berisha, takimin e parë të Vitit të Ri ua ka rezervuar foshnjave të porsaardhura në jetë.

Berisha ka zgjedhur maternitetin “Mbretëresha Geraldinë”, për të përcjellë urimin e parë të vitit 2012.Duke uruar fëmijët e parë që erdhën në jetë pak pas mesnatës, që shënoi ndërrimin e viteve, Berisha tha se fjalët e para që i erdhën ndërmend, kur dëgjoi për lindjet që sollën në jetë dy djem, ishin: “Lindën Ismail Qemali e Isa Boletini”.

“I lindën Shqipërisë edhe njëherë burrat më të mëdhenj të saj”, tha Berisha.

Ai i ka uruar jetë të gjatë edhe foshnjës së parë që lindi në maternitetin “Mbretëresha Geraldinë”.

“I uroj Aleksandrit të festojë 200 vjetorin e Pavarësisë, duke qenë se lindi në ditën e parë të 100 vjetorit”.

Mengjesin e sotem Presidenti i Republikës së Shqipërisë, Bamir Topi  i ka uruar jete te lumtur dhe shendet Roanit te vogel dhe familjes se tij.