Është mbyllur edicioni i 100-të i panairit Muba

Në panairin e Bazelit janë prezantuar ofertat e 552 ekspozuesve nga 22 vende të botës

Mbrëmjen e të dielës në Bazel është mbyllur edicioni i 100-të i panairit të njohur Muba (ose Mustermesse Basel). Në të gjitha aktivitetet e këtij panairi kanë marrë pjesë 131.893 vizitorë që është afërsisht numër i ngjashëm me atë të vitit të kaluar, shkruan srf.ch.

Në panair janë prezantuar ofertat e 552 ekspozuesve nga 22 vende të botës  pastaj ka pasur program festiv jubilar, ekspozita si ajo e nostalgjisë dhe e pllakateve etj.

Muba është i njohur edhe për atë se vizitorët e shfrytëzojnë atë për të bërë blerje. Këtë vit ka pasur një rritje të konsiderueshme të shumës mesatare që ata kanë dhënë për të blerë gjësende të ekspozuara këtu. Kështu përderisa vitin e kaluar mesatarisht një vizitor kishte shpenzuar 650 franga, këtë vit mesatarja ka qenë 725 franga për një pjesëmarrës.

Muba është panairi më i vjetër në Zvicër.