Trafiku ajror në Europë mund të mos rikthehet në normalitet deri më 2029

Trafiku ajror në Europë mund të mos i rikthehet normalitetit para pandemisë deri në vitin 2029, ka njoftuar Eurocontrol.

Në një raport të publikuar të premten, agjencia e menaxhimit të trafikut ajror me seli në Bruksel tha se numri i fluturimeve në Europë në periudhën janar-prill ka rënë me 65 për qind, në krahasim me të njëjtën periudhë në 2019.

Agjencia ka parashikuar tri modele të ndryshme për të ardhmen e udhëtimeve ajrore në Europë, në varësi dhe të fushatës së vaksinimeve dhe efikasitetit të tyre ndaj varianteve  të reja.

Në skenarin më të mirë, kufizimet mbi udhëtimet mund të hiqen në verë të vitit 2021.

Por nëse fushata e vaksinimeve vijon me hapa të ngadaltë, kjo do ta cenonte besimin e pasagjerëve dhe mund ta shtyjë rimëkëmbjen deri në fund të dekadës, deklaroi Eurocontrol.