Familjet me një prind mbeten veçanërisht të ekspozuara ndaj varfërisë në qytetet zvicerane. Sipas analizës për vitin 2025 të Iniciativës së Qyteteve për Politikën Sociale, që përfshin 20 lokalitete, po shtohet numri i këtyre familjeve që mbështeten në ndihmën sociale, raporton RSI, transmeton albinfo.ch.
Në qytetet e përfshira në studim, 59 për qind e të miturve përfitues të ndihmës sociale jetojnë me një prind, kundrejt 52 për qind në vitin 2010. Raporti evidenton se rreziku i varfërisë për këto familje është dukshëm më i lartë sesa për llojet e tjera të ekonomive familjare.
Për shumë prej tyre, ndihma sociale shërben për të plotësuar të ardhura që nuk mjaftojnë për nevojat e familjes. Për t’i ndihmuar prindërit e vetëm të dalin nga asistenca, qytetet mbështeten te formimi profesional, kujdesi ditor për fëmijët me orare fleksibile dhe përfitimet plotësuese për familjet.
