Festa e Vitit të Ri në Kosovë do të jetë me drita falë Shqipërisë

Kryeministri Edi Rama ka premtuar se Shqipëria do të ndihmojë Kosovën, që të mos i mungojë energjia elektrike në dy ditët e festës së Vitit të Ri.

Ai ka kërkuar nga Ministria e Energjisë të vlerësojë çdo mundësi ndihme për Qeverinë e Kosovës.

“Duke e ndjekur me shqetësim krizën e rëndë energjetike që ka prekur Kosovën, kërkova sot nga Ministria e Energjisë të vlerësojë çdo mundësi ndihme për Qeverinë e Kosovës, që familjeve në Kosovë të mos u mungojë energjia elektrike në dy ditët e festës popullore të ndarjes së viteve”, tha Rama.

Sipas tij, Shqipëria s’e ka aspak të lehtë mbrojtjen e vijueshme të familjeve e sipërmarrjeve të vogla nga dallga e tërbuar e krizës energjetike që po kërcënon çdo vend, por siç shkroi Rama, në sëkëlldira të mëdha apo në gëzime popullore, siç është Viti i Ri, s’mund të mos e ndajnë me Kosovën aq sa kemi.

 

---