Finalja e ëndrrave: “Wembley” me 65 mijë tifozë

Ethet e finales janë rritur derisa po afrohet momenti vendimtar në Kampionatin Evropian

Momenti vendimtar ka arritur. Pas një rrugëtimi 1 mujor, Italia dhe Anglia përballen në finale, që do të zhvillohet në Londër, përkatësisht stadiumin “Wembley”.

Për anglezët është një ëndërr që të luajë para shikuesve, në finalen e parë evropiane, dhe me shpresë se do të fitojnë trofeun e çmuar. Titulli i vetëm është ai i Kupës së Botës më 1966 që ishte fituar pikërisht në vendin e tyre. Në vendin ku u shpik futbolli, shkruan albinfo.ch.

Edhe në finale priten rreth 65 mijë shikues, por edhe më shumë emra të njohur në tribunat VIP.

Kryeministri Boris Johnson ka dhënë leje për vetëm 1.000 italianë, që të hyjnë në Mbretërinë e Bashkuar për të parë finalen, me një biletë që kushton 610 euro, ose 525 funte, ndërkohë në Angli fansat e shumtë vendas vazhdojnë të rifreskojnë faqen e posaçme të UEFA-s, me shpresën se mund të përfitojnë ndonjë nga biletat e kthyera në çastet e fundit. Mundësitë e tjera vijnë nëpërmjet rrjeteve sociale, ku çmimi i një bilete fillon minimalisht nga 3.000 funte, gjithsesi interesimi për një ndeshje të tillë historike është vërtet i jashtëzakonshëm.

Dy vendet figurojnë në dhjetëshen e parë të botës. Kështu Anglia renditet në vendin e katërt, ndërsa Italia pozicionohet e shtata në klasifikimin e përgjithshëm të FIFA-s.

 

---