Flet edhe Xhaka, tregon pse u zëvendësua nga Petkoviq

Të gjithë po pyesin pse u zëvendësua Granit Xhaka nga trajneri Vladimir Petkoviq

Barazimi i Zvicrës me Danimarkën ka bërë shumë bujë në Zvicër, por më shumë zëvendësimi i Granit Xhakës.

Xhaka shënoi golin e dytë në barazimin 3:3, derisa u largua në minutën e 79-të, derisa më pas danezët realizuan tre herë, shkruan albinfo.ch.

Gazeta ‘Blick’ i ka dhënë notën më të lartë 6, apo maksimale dhe i vetmi që u notua me këtë notë.

Por, të gjithë po pyesin pse u zëvendësua Xhaka nga trajneri Vladimir Petkoviq.

“Graniti nuk mund të vazhdonte në fushë sepse ishte duke vuajtur nga një lëndim. Ai kërkoi zëvendësimin dhjetë minuta më herët”, shpjegoi Vladimir Petkoviq, duke arsyetuar zëvendësimin e Xhakës.

Por, për të shuar polemikat ka menduar vetë mesfushori shqiptar. “Nuk mund të luaja, në zhveshtore ne folëm për një zëvendësim, por pasi Ricardo Rodriguez duhej të largohej shkaku i lëndimit, kam dashur të jem në dispozicion të ekipit sa më gjatë të jetë e mundur. Pas golit tim, i kam dhënë sinjal stolit që duhet të largohem sa më shpejtë. Zëvendësimi ishte i pashmangshëm”, deklaroi Xhaka.

Ai u shpall lojtari më i mirë i ndeshjes. Zvicra ka katër pikë nga dy ndeshje në kualifikimet për “Euro 2020”, kurse kjo ishte ndeshja e parë për danezët. Ata të enjten barazuan 2:2 me Kosovën, në miqësoren e zhvilluar në Prishtinë.

---