Shumëfishohet numri i ankesave: Shkak, fluksi i madh i kosovarëve

Nëse gjatë gjithë vitit të kaluar ishin bërë gjithsej 77 ankesa, vetëm në këtë tremujor shifra e tyre është ngritur në 419!

Numri i madh i migrantëve nga Kosova që gjatë janarit dhe shkurtit të këtij viti kishin kërkua azil në Gjermani, me gjasa pothuaj kurrfarë për ta fituar atë, ka prodhuar një shtim enorm të ankesave. Në fakt, shumicës së madhe të tyre u kanë ardhur përgjigje negative (u është refuzuar azili) kështu që ata kane bërë ankesa. Kjo ka rezultuar me një shumëfishim të numrave të zakonshëm të ankesave të bëra në Gjykatën Administrative Federale në Karlsruhe  gjatë tremujorit të fundit. Nëse gjatë gjithë vitit të kaluar ishin bërë gjithsej 77 ankesa, vetëm në këtë tremujor shifra e tyre është ngritur në 419!

Se kjo rritje vjen nga kosovarët, në Zyrën Federale për Migracion nuk ka asnjë dyshim. Ndërsa shkas plotësues i rritjes është vendimi i marrë nga mesi i shkurtit për shkurtimin e procedurave të azilit për azilkërkuesit nga Kosova.

“Nga fundi i shkurtit dhe fillimi i marsit ndodhi që shifrat të rriteshin në mënyrë drastike”, ka thënë një zëdhënës i zyrës në fjalë, shkruan focus.de, transmeton albinfo.ch .

Gjykata e përmendur do t`a përballojë këtë fluks e forca e veta edhe pse gjykatat administrative vartëse në Stuttgart dhe Freiburg janë shprehur të gatshme për të ndihmuar.

Nga 18 shkurti i këtij viti, në landet gjermane Baden-Württemberg, Bavari, Niedersachsen dhe Nordrhein-Westfallen, kërkesat e azilit të bëra nga kosovarët janë përpunuar me përparësi. Kjo mundëson dëbimin më të shpejtë të tyre në atdhe. Kosovarët sipas rregullit, nuk fitojnë azil, pasi që shumica nuk konsiderohen të ndjekur politik por si refugjatë ekonomikë.