Franca regjistroi mbi 5,700 vdekje gjatë valës së të nxehtit

Temperaturat ekstreme morën mijëra jetë në Francë këtë verë

 

Raporti i Santé publique France e cilëson bilancin të paprecedentë për një fillim vere, ndërsa ngre pyetje edhe për ndikimin e temperaturave ekstreme në Ballkan, përcjell albinfo.ch.

Franca ka regjistruar 5,764 vdekje të tepërta gjatë valës së të nxehtit që përfshiu vendin në periudhën 17 qershor – 2 korrik 2026, ka njoftuar agjencia kombëtare e shëndetit publik Santé publique France.

Sipas raportit të publikuar më 22 korrik, kjo shifër konsiderohet e paprecedentë për një fillim vere. Rreth dy të tretat e viktimave ishin persona mbi moshën 75-vjeçare, duke konfirmuar se të moshuarit mbeten grupi më i rrezikuar gjatë episodeve të nxehtësisë ekstreme.

Kulmi i vdekjeve u regjistrua më 25 dhe 27 qershor, ndërsa në atë interval u shënua një rritje e vdekshmërisë prej rreth 36% krahasuar me nivelet e zakonshme.

Autoritetet franceze theksojnë se vala e të nxehtit u shoqërua edhe me stuhi të forta, duke rënduar më tej situatën në disa rajone të vendit.

Fenomeni nuk u kufizua vetëm në Francë. Edhe Ballkani, përfshirë Shqipërinë, u përball gjatë javëve të fundit me temperatura rekord, zjarre dhe stuhi intensive. Megjithatë, ndërsa Franca ka publikuar një bilanc të detajuar të ndikimit në shëndetin publik, në Shqipëri ende nuk ka të dhëna zyrtare për numrin e vdekjeve të lidhura me valët e të nxehtit.

Ekspertët e shëndetit publik theksojnë se publikimi i vdekjeve të tepërta nuk është vetëm statistikë, por edhe një tregues i kapacitetit të institucioneve për të monitoruar rreziqet, për të mbrojtur grupet vulnerabël dhe për të reaguar në kohë ndaj krizave klimatike.

Në këtë kontekst, mbetet ende pa përgjigje pyetja se sa vdekje të tepërta kanë shkaktuar valët e të nxehtit të kësaj vere në Shqipëri dhe cili është plani konkret i institucioneve për përballimin e valës së radhës. /Albinfo.ch

---