Gazetarët britanikë i bëjnë kamerë të fshehtë shqiptarit

Ky është “Luani i artë” që trafikon emigrantët në Angli

Gazetarët britanikë të “Daily Mail” kanë inskenuar një takim me një shqiptar, i cili dyshohet se është i përfshirë në kontrabandimin e emigrantëve shqiptarë drejt Anglisë, përcjell albinfo.ch.

Përmes kamerës së fshehtë, ky shqiptar, të cilin e njohin me nofkën “Luani i artë” (Golden lion), takohet me disa shqiptarë të tjerë, të cilët i kërkojnë ndihmë për të shkuar në Britani të Madhe.

Gjithçka do të bëhet kundrejt pagesës. Të infiltruarit që u përdorën nga gazetarët britanikë përmendën shumën 4500 Paund, ndërsa “Luani i artë” u thotë se do ta diskutojnë për më pak se aq.

“Ai mund të bëjë 1 milion Paund në javë duke dërguar emigrantë në Britani me gomone”, shkruan Daily Mail.

Ai premtoi gjithashtu se autoritetet britanike do t’i ndihmojnë emigrantët, duke u dhënë ushqim dhe gjithçka tjetër që ju nevojitet, dhe më pas do t’i dërgojnë në një hotel. Pas kësaj mund të shkojnë ku të duan.

“Pak orë pas takimit tonë, gangsteri shqiptar u kap nga policia franceze dhe u lirua mëngjesin tjetër”, shkruan Daily Mail.

Regjistrimi me kamerë të fshehtë i shqiptarit, të cilin e quajnë “Luani i artë”, është realizuar në Francë. Pikërisht nga brigjet franceze nisen gomonet me emigrantët shqiptarë drejt brigjeve të Britanisë së Madhe, aty ku i presin anëtarë të tjerë të organizatave kriminale.

 

 

---