Gentilini, i dërguari i posaçëm i BE-së në Kosovë

Diplomati italian Fernando Gentilini është emëruar i dërguari i posaçëm i BE-së në Kosovë për një periudhë tremujore. Gentilini do të zëvendësojë Pieter Feith, të cilit më 30 prill i skadoi mandati i përfaqësuesit të posaçëm të BE-së.

Këtë vendim e ka marrë Brukseli me qëllim që të mos ketë vakum të pranisë së BE-së në Kosovë.

Në të njëjtën kohë, Gentilini do të jetë edhe shef i Zyrës Ndërlidhëse të Komisionit Evropian në Kosovë.

Emërimi i tij për një periudhë kalimtare është bërë për shkak se shtetet anëtare të BE-së ende nuk janë pajtuar rreth riorganizimit të pranisë në Kosovë. Por, edhe 13 kandidatët që kanë konkurruar në këtë post nuk kanë ndonjë peshë politike, por janë kryesisht ambasadorë të BE-së dhe deputetë të Parlamentit Evropian.

Aktualisht, Fernando Gentilini është një nga këshilltarët për Ballkanin në Sekretariat të BE-së dhe është i përfshirë edhe në dialogun për çështje teknike ndërmjet Kosovës dhe Serbisë. Ai ka punuar në Kosovë në vitin 2004 dhe 2005, si përfaqësues personal i Javier Solanës.