Gjermani: Nxirret nga qarkullimi autobusi shqiptar me 54 udhëtarë

Ekspertiza ka konstatuar ndryshkje në pjesë të ndrshme ndërsa timoni ishte aq i shkatërruar sa që mund të qëndronte më së shumti edhe disa kilometra

54 udhëtarë të një autobusi shqiptar të bërë për skrap po shkonin në Paris, kur doganierët gjermanë në autostradën A8 detyruan shoferin të bënte një ndalesë të detyrueshme. Pas shikimit të gjendjes katastrofave të autobusit, ata e  nxorën shqiptarin nga qarkullimi, afër qytetit Mühlhausen.

Ajo që kishte shtyrë policinë ta ndalte autobusin ishte xhami i përparshëm, që i shërben shoferit për të parë jashtë, i shkatërruar. Pasi që ngasësi i autobusit nuk ishte kujdesur për detyrimin e udhëtarëve për të vendosur rripin sigurues, njëri nga udhëtarët në momentin kur shoferi kishte frenuar ishte përplasur për xhamin mbrojtës.

Pastaj doganierët kanë thirrur policët e komisariatit të komunikacionit nga Mühlhauseni, të cilët e kanë inspektuar autobusin. Ekspertiza ka konstatuar se timoni ishte aq i shkatërruar sa që mund të qëndronte ndoshta më së shumti edhe disa kilometra, shkruan schwäbischer Zeitung. Karoseria ishte e ndryshkur ashtu si dhe boshti i mbrapmë. Frenat dhe boshti po ashtu nuk funksiononin si duhet.

Në përgjithësi, eksperti e ka klasifikuar autobusin si totalisht të dëmtuar. Për rrjedhojë, atij i janë hequr tabelat ndërsa udhëtarët janë bartur në një autobus tjetër me të cilin kanë vazhduar rrugën për në Paris. Vetëm shoferi dhe familjarët e tij, njëherësh pronarë të autobusit, të mbetur pa para po qëndrojnë në Geislingen dhe po presin ndihmë nga Shqipëria.