Shkrimtari Pajtim Statovci, një nga emrat e vlerësuar të letërsisë bashkëkohore nordike me prejardhje nga Kosova, ishte mysafir në Bibliotekën e Qytetit të Göteborgut në Suedi, më 19 tetor 2026, në kuadër të programit “Skena Ndërkombëtare e Shkrimtarëve”, shkruan albinfo.ch.
Statovci, i lindur në Kosovë në vitin 1990 dhe i rritur në Finlandë, është fitues i dyfishtë i çmimit prestigjioz Finlandia. Ai vjen para lexuesve me romanin e tij të katërt, Kon föder på natten, titulli i të cilit në shqip mund të përkthehet “Lopa lind natën”.
Veprat e tij, të përkthyera në më shumë se 20 gjuhë, trajtojnë tema të ndjeshme si humbja, përjashtimi, identiteti dhe pasojat e luftës në Kosovë gjatë viteve ’90. Përmes rrëfimeve letrare, autori eksploron përvojat njerëzore dhe ndikimin që historia, mërgimi dhe kujtesa kanë në jetën e individit.
Gjatë prezantimit të tij në Göteborg, u vu në pah edhe rëndësia e një brezi të ri shkrimtarësh me rrënjë nga Kosova, të cilët, pas largimit nga vendlindja si refugjatë, kanë ndërtuar karrierën e tyre letrare në vende të ndryshme evropiane.
Krahas Pajtim Statovcit, në këtë brez përmenden edhe shkrimtarja Jehonë Kicaj, gazetari dhe autori Diamant Salihu, si dhe Yllka Sheqiri. Përmes veprave të tyre, ata sjellin përvoja të lidhura me prejardhjen, identitetin dhe jetën mes kulturave të ndryshme, duke dëshmuar potencialin krijues të brezave të diasporës.
Mbrëmja letrare u organizua nga Biblioteka e Qytetit të Göteborgut, në bashkëpunim me shtëpinë botuese suedeze Förlaget, e cila boton romanin e fundit të Statovcit në gjuhën suedeze.
Për këtë aktivitet ka njoftuar Rizah Sheqiri, i cili ka vënë në pah rëndësinë e suksesit të shkrimtarëve me prejardhje nga Kosova dhe kontributin e tyre në letërsinë ndërkombëtare.
Ndërkohë, gazeta suedeze Dagens Nyheter ka publikuar një recension për veprën e re të Statovcit. Sipas njoftimit të Sheqirit, recensioni është përkthyer në shqip nga Shuquri S. Sejdijaj dhe mund të lexohet në faqen e tij në Facebook.
Suksesi i Pajtim Statovcit dëshmon se përvojat e mërgimit dhe rrënjët kosovare mund të shndërrohen në vepra letrare me jehonë ndërkombëtare, duke e bërë letërsinë një urë lidhëse mes historive personale, kulturave dhe shoqërive të ndryshme./Albinfo.ch
