Gjermania do të përballet me dimër të vështirë, paralajmëron Merkel

KEYSTONE/EPA/JOHN THYS / POOL

Merkel u bëri thirrje gjermanëve që të mblidhen në respektimin e kufizimeve dhe të refuzojnë ata që nuk pranuan të ndiqnin shkencën në luftimin e përhapjes së sëmundjes.

Në fjalimin e saj në Bundestag të enjten, Merkel tha: “Ne jemi në një situatë dramatike që na prek të gjithëve. Pa përjashtim”.

Të mërkurën Merkel dhe udhëheqësit e shtetit ranë dakord për një mbyllje në të gjithë Gjermaninë që të ndodhte nga 2 nëntori deri në fund të muajit.

Merkel tha se autoritetet shëndetësore në Gjermani janë mbingarkuar tashmë nga përhapja e Covid-19 dhe se 75 për qind e infeksioneve nuk mund të gjurmohen më. Nëse rritja e rasteve vazhdon me këtë ritëm, pavijonet e kujdesit intensiv së shpejti do të mbingarkohen, tha politikani i Unionit Demokristian (CDU).

Masat e ashpra të reja që janë miratuar janë “të përshtatshme, të domosdoshme dhe proporcionale”. Qëllimi është që të kemi një “zvogëlim sistematik të kontakteve” në popullatë, tha Merkel. Punonjësit shëndetësorë duhet të jenë në gjendje të gjurmojnë zinxhirët e infeksionit. Kjo është mënyra e vetme që rreziku i shpërthimeve mund të zvogëlohet, tha ajo.

Merkel tha se ‘pandemia do të marrë fund’, por pandemia po e vë shoqërinë në provë, në aspektin mjekësor, politik, ekonomik dhe shoqëror.

Gjermania do të ishte në gjendje ta përballonte këtë sfidë vetëm me kohezion dhe gatishmëri për të mbështetur njëri-tjetrin.

“Dimri do të jetë i vështirë. Katër muaj të gjatë, të vështirë. Por do të mbarojë”, shtoi ajo, shkruan thelocal.de, përcjell albinfo.ch.