Gjermania rrit prezencën ushtarake në Ballkan

Për ta ruajtur stabilitetin në prag të zgjedhjeve që do të mbahen në tetor, Qeveria gjermane do të dërgojë 50 ushtarë në misionin paqeruajtës EUFOR/Althea në Bosnjë-Hercegovinë.

Dhjetë vjet pas largimit, ushtarët gjermanë do të shkojnë sërish në Bosnjë e Hercegovinë. Këtë vendim e ka miratura qeveria gjermane të mërkurën.

Bëhet e ditur se kontingjenti i parë me 25 pjesëtarë të Bundeswehrit pritet të niset në Bosnjë e Hercegovinë në muajin gusht. Mandati është parashikuar fillimisht për një vit. Para se të hyjë në fuqi, ai duhet të miratohet nga Bundestagu.

Zëdhënësi i qeverisë gjermane, Steffen Hebestreit, e argumentoi këtë shtim të prezencës gjermane në rajon me rëndësinë thelbësore që ka për BE-në dhe vendet anëtare stabiliteti dhe siguria në Bosnjë e Hercegovinë dhe Ballkanin Perëndimor. “Gjermania do të japë ndihmesën e saj në ruajtjen e stabilitetit në prag të zgjedhjeve, në tetor 2022”, tha ai.

Ndërsa zëdhënësi i Ministrisë së Mbrojtjes, David Helmbold, tha se kontingjenti i parë do të jetë nën 50. Sipas tij, një pjesë do të stacionohet në Komandën Qendrore në Sarajevë, kurse një pjesë tjetër do të jetë në terren me ekipe vëzhguese dhe ndërlidhëse dhe do të monitorojnë gjendjen në vend.

“Ata do të shërbejnë si sy e vesh për misionin, në mënyrë që, në rast nevoje, të reagohet me shtim forcash”, tha Helmbold në konferencën e rregullt të zëdhënësve të qeverisë gjermane, të mërkurën në Berlin. /DW

---