Gjithçka gati: Sot mbahet Panairi i Bizneseve Shqiptare në Austri

Hapja zyrtare e panairit do të bëhet në orën 10:00, në Arena 21, MQ, Museumsplatz1, Wien.

Panairi i Bizneseve Shqiptare në Austri është një event i rrallë, ku bizneset shqiptare prezantohen së bashku para publikut në kryeqytetin austriak.

Punën e tyre do ta prezantojnë një numër i konsiderueshëm i bizneseve shqiptare që veprojnë në Austri, duke filluar nga gastronomia, hoteleria, ndërtimtaria, mediat, it- design, imobile, estetikë.

Si pjesë e panairit do të jetë edhe libri / katalogu, ku do të prezantohen firmat pjesëmarrëse të panairit, i cili do t’u shpërndahet vizitorëve.

Kryetari i Rrjetit të Bizneseve Shqiptare në Austri, Yll Blakaj, ka thënë se kjo është një mundësi e mirë që bizneset të cilat janë pjesë e këtij rrjeti të prezantojnë punët dhe aktivitetet e tyre.

“Kjo është një mundësi e mirë që bizneset që janë pjesë e rrjetit të prezantojnë punët dhe aktivitetet e tyre. Gjithashtu është mundësi e mirë për komunitetin tonë në diasporë që t’i vizitojnë firmat shqiptare dhe të njihen me veprimtarinë e tyre. Presim që këto takime të sjellin rezultate dhe nga panairi të krijohen bashkëpunime të reja mes bizneseve, gjithashtu mes bizneseve dhe qytetarëve tanë në diasporë”, ka thënë Blakaj.

Ai i ka ftuar të gjithë ata që kanë dëshirë të vizitojnë panairin dhe të njihen me punën dhe veprimtarinë e kompanive shqiptare në Austri dhe jo vetëm. Hyrja është falas.

“Ftojmë qytetarët shqiptarë dhe bizneset, edhe nëse nuk janë pjesëmarrëse në panair, të na vizitojnë dhe të shfrytëzojnë këtë organizim të mirë”.

Pjesë e panairit do të jetë edhe ministrja e Industrisë, Ndërmarrësisë dhe Tregtisë, Rozeta Hajdari

Në panair pritet të marrin pjesë edhe 15 kompani nga Kosova.

Panairi i Bizneseve Shqiptare në Austri organizohet nga Rrjeti i Bizneseve Shqiptare në Austri, ndërkohë këtë vit pjesë e panairit është edhe platforma mediale shqiptare në Austri, albinfo.at. 

---