Gjithçka që duhet të dini për takimin e sotëm Itali – Austri

(KEYSTONE/Jean-Christophe Bott)

Sot, Italia dhe Austria përballen në kryeqytetin anglez në raundin e eliminimit të Kampionatit Evropian. Ndeshja do të zhvillohet sot me fillim nga ora 21:00. Italia hyn në këtë takim si favorite ndaj Austrisë, përcjell albinfo.ch.

Skuadra e Mancinit ka arritur të grumbullojë 9 pikë në grupin e saj, duke shënuar 7 gola dhe duke mos pësuar asnjë gol në 3 takime të grupit A. Italia po ashtu në këtë proces ka barazuar rekordin e 30 ndeshjeve pa humbje të vendosur gjatë viteve 1935-1939. Kombëtarja italiane nuk është mposhtur nga asnjë ekip që nga 10 shtatori i vitit 2018 nga Portugalia.

Gjatë kësaj periudhe Italia ka fituar 25 ndeshje dhe ka barazuar 5, duke i fituar 10 duelet e fundit të gjitha me portë të paprekur.

Në anën tjetër Austria ka mbyllur fazën e grupeve me 6 pikë duke fituar 2 takime dhe duke humbur një. Austria ka mposhtur Maqedoninë e Veriut dhe Ukrainën kurse ka pësuar humbje nga Holanda.Para fillimit të takimit të dy trajnerët kanë folur për mediat duke treguar respekt për njëri – tjetrin. Trajneri i Austrisë, Franco Foda tha se Italia është një skuadër që nuk ka humbur qe një kohë të gjatë por se do të vie dita që një ditë ata të humbin sërish. “Në këtë fazë të turneut, nuk ka kundërshtarë të lehtë. Italia nuk ka humbur për një kohë të gjatë, por ndoshta do të vijë një kohë kur ata do të humbasin përsëri. Do të jetë e rëndësishme për ne që të përgatitemi mirë dhe të jemi të fokusuar, atëherë ne do të bëjmë gjithçka që mundemi për të fituar në Londër. Do të jetë e vështirë, por ekipi është i etur dhe i gatshëm. Unë kam një plan“, tha Foda. Kurse Mancini tha se Austria ka një ekip cilësor dhe agresiv. “Do të na duhet të zhvillojmë një ndeshje të shkëlqyer. Austria ka cilësi dhe është agresive”, tha Mancini.