Gjykata në Cyrih e shpall dy herë të pafajshme kundërshtaren e maskës

Shfajësimi i parë është sepse nuk është vërtetuar se ajo në fakt ka marrë pjesë në demonstratën kundër detyrimit të maskës...

Gjykata e Qarkut e Cyrihut e ka liruar dy herë nga fajësia një grua 44 vjeçe, kundërshtare të vënies së maskës, shkruan srf.ch.

Shfajësimi i parë është sepse nuk është vërtetuar se ajo në fakt ka marrë pjesë në demonstratën kundër detyrimit të maskës. Shfajësimi tjetër vjen për shkak të një vendimi të Gjykatës Federale, të marrë në shtator.

Në këtë vendim themelor gjyqtarët e gjykatës më të lartë të vendit kanë arritur në përfundimin se kufizimet e forta lidhur me koronën, në raport me pjesëmarrësit në demonstrata, ishin joproporcionale.

Më 25 janar të këtij viti, në Walcheturm në Cyrih ishin takuar 50 deri 100 kundërshtarë të maskave, transmeton albinfo.ch. Ata demonstruan kundër vendimit që nxënësit e shkollave fillore të mbajnë maska.

Pak më larg, në anën tjetër të rrugës, 44-vjeçarja kishte filmuar skenën nga shtëpia e saj. Ajo nuk ishte pjesë e demonstratës, ka theksuar gruaja  në gjykatë. Përkundrazi, ajo “rastësisht i kishte rënë asaj rruge”, sepse kishte një takim me mjekun aty pranë.

---