Greqia vazhdon luftën me zjarret

Ilustrim

Greqia ka hyrë në ditën e pestë që kur pyjet janë duke u djegur në perëndim të Athinës.

Zjarrfikësit, të mbështetur nga avionë që bartin ujë dhe me ndihmë nga personeli shtesë nga Qiproja, Franca, Izraeli dhe Italia, u përpoqën të kontrollonin zjarrin që shpërtheu në zonën më të gjerë të Athinës, duke shkatërruar shtëpi dhe duke detyruar evakuime të banorëve, shkruan Radio Evropa e Lirë.

“Ne po vazhdojmë të luftojmë zjarrin në perëndim të Athinës. Po i frikësohemi rindezjes së tij”, tha një zyrtar i zjarrfikësve për agjencinë e lajmeve Reuters, përcjell albinfo.ch.

Nga këto zjarre janë dëmtuar mbi 100 shtëpi dhe biznese, ndërkohë që shumë pranë Athinës ka shpërthyer edhe një zjarr tjetër.

Qeveria njoftoi të premten se do të ndajë ndihma për familjet e prekura, bëhet fjalë për ndihmën financiare dhe subvencione për shtëpitë me qira.

Ndërkaq, dy zjarre të tjera në pyje në ishullin Rodos dhe në lagjen Lakonia në Greqinë jugore u vunë nën kontroll të premten, përcjell albbinfo.ch.

Ministri për Krizat Klimatike, Vasilis Kikilias, u bëri thirrje njerëzve të qëndrojnë vigjilentë, shkruan REL.