Hamza: Shteti duhet të jetë pranë ish-krerëve të UÇK-së

Kreu i PDK-së, Bedri Hamza, tha se me zgjedhjen e presidentes së re duhet të rritet angazhimi institucional për procesin gjyqësor ndaj ish-krerëve të UÇK-së në Hagë.

Kryetari i PDK-së, Bedri Hamza, ka reaguar pas zhvillimeve të fundit politike në Kosovë, duke thënë se me krijimin e institucioneve të reja duhet të ketë angazhim më të madh shtetëror për ish-krerët e UÇK-së, përcjell albinfo.ch.

Hamza e lidhi këtë angazhim me betejën për drejtësi, të vërtetën dhe atë që ai e cilësoi si pastërtinë e luftës çlirimtare. Sipas tij, kjo çështje nuk mund të mbetet vetëm përgjegjësi e individëve, familjeve dhe mbrojtësve të ish-krerëve.

“Beteja për drejtësi në Hagë nuk mund të bëhet më vetëm nga individët, familjet, dashamirët dhe mbrojtësit e tyre. Shteti ynë tani duhet të jetë pranë tyre, me të gjitha kapacitetet dhe përgjegjësitë që i takojnë”, ka shkruar Hamza.

Ai ka përmendur edhe protestat e qytetarëve në Kosovë dhe diasporë, ndërsa ka bërë thirrje për koordinim dhe bashkëpunim institucional lidhur me këtë çështje.

Hamza ka theksuar se tashmë Kuvendi ka miratuar një deklaratë të përbashkët politike dhe ndryshime në ligjin për Dhomat e Specializuara, ndërsa Kosova ka edhe presidenten e re. Ai ka kërkuar që këto zhvillime të shoqërohen me veprime konkrete institucionale.

“Beteja jonë për drejtësi duhet të vazhdojë. Dhe në këtë betejë, çlirimtarët tanë nuk do të jenë vetëm”, ka deklaruar Hamza./Albinfo.ch

---