Hapet panairi “Ditët e biznesit të vogël 2011”

Në hapjen e panairit “Ditët e biznesit të vogël 2011”, ndërmarrjet e vogla dhe të mesme u vlerësuan si shtylla kryesore e zhvillimit ekonomik të vendit, meqë përbëjnë 99 për qind të bizneseve të regjistruara në Kosovë.

Të pranishmit kanë vlerësuar se duhet kujdes më i mirë ndaj sektorit privat, të cilin e përbëjnë pjesa më e madhe e bizneseve të vogla dhe të mesme.

Ministri i Financave i Kosovës, Bedri Hamza ka deklaruar se Qeveria e ka si top prioritet rritjen ekonomike në vend.

Sipas tij, kjo nuk mund të bëhet ndryshe, përveçse duke e fuqizuar sektorin privat, ndërsa sektorin publik e quajti si mbështetës të ekonomisë në vend.

Ndërkaq kryeshefi ekzekutiv i Agjencisë për Mbështetjen e Ndërmarrjeve të Vogla dhe të Mesme, në kuadër të Ministrisë së Tregtisë dhe Industrisë, Granit Berisha ka thënë se panairi është edhe një pikëtakim i ndërmarrjeve të ndryshme dhe të donatorëve, në mënyrë që të zhvillohen këto biznese.

Kurse, kryetari i Odës Ekonomike të Kosovës, Safet Gërxhaliu, panairin e cilësoi si një mundësi të re për krijimin e raporteve të reja në mes bizneseve.

Ai ka thënë se nëse Kosova mendon të jetë pjesë e integrimeve evropiane, atëherë duhet të fillojë nga integrimi ekonomik i vendit.

Panairi “Ditët e biznesit të vogël 2011” organizohet nga Ministria e Tregtisë dhe Industrisë përmes Agjencisë për Mbështetjen e Ndërmarrjeve të Vogla dhe të Mesme si dhe partnerëve të tjerë, si Oda Ekonomike e Kosovës, Trusti Pensional, dhe donatorë të tjerë.