Haradinaj: Eksperiment i rrezikshëm, loja me kufij e territore

Kryeministri i Kosovës, Ramush Haradinaj, vazhdon të kundërshtojë fuqishëm idenë e presidentit për korrigjim të kufijve. Ai e ka quajtur eksperiment të rrezikshëm lojën me kufij e territore.

“I lus të gjithë të kenë kujdes. Të gjithë ne jemi të vetëdijshëm se sa rrezik është loja me kufij në Ballkan. Kur hapen, nuk ka garanci se kur do të mbyllen, pas çfarë tragjedive dhe në të mirën e kujt, e Kosova nuk e ka luksin të flasë për ndryshime territori, kufijsh apo popullsie”, ka thënë kryeministri, pas mbledhjes së Qeverisë.

Ai është treguar i rezervuar të deklarohet rreth rezolutës që liderët e Luginës një ditë më herët ia dorëzuan presidentit, e që synohet të dalë shpejt në Kuvend për votim, përcjell albinfo.ch.

“Qeveria ime ka shkuar përpara me përkrahje për Preshevën. Kemi komunikim shumë të mirë për interesat e përditshme për mbijetesën e shqiptarëve në Luginë, për të tjerat mbaj pozicion të rezervuar, meqë i obligohem Kushtetutës, integritetit, sovranitetit dhe kufijve”, ka thënë kryeministri. Edhe ai njëjtë, si presidenti nuk e di se kur do të vizitojë Luginën. Kur foli për vizitën e presidentit në Mal të Zi dhe çfarë është bërë sa i përket korrigjimit, kryeministri ka thënë se nuk ka presion kohor, meqë sipas tij, temë shumë me rëndësi është liberalizimi.